Европа Парламенти Украинага ёрдам учун 1,2 миллиард евро ажратди
Макромолиявий ёрдам кредитлар шаклида тақдим этилади, улар йил давомида икки траншда ўтказилади.
Европарламент аъзолари Европа Иттифоқи кенгашининг Украинага 1,2 миллиард евро миқдорида янги макромолиявий ёрдам пакетини ажратиш ҳақидаги қарорини маъқуллади. 15 февраль куни бўлиб ўтган овоз беришнинг тегишли натижалари тўғрисида қонун чиқарувчи органнинг Страсбургдаги сессиясида маълум қилинди.
“Иттифоқ 1,2 миллиард евро миқдорда макромолиявий ёрдам беради, бу эса Украинада макроиқтисодий барқарорликни таъминлаш ва фундаментал ислоҳотлар дастурини қўллаб-қувватлаш учун ажратилган”, дейилади депутатлар томонидан қабул қилинган ҳужжатда.
Қайд этилишича, “бу ёрдам кредит шаклида тақдим этилади” ва “Халқаро валюта жамғармаси дастурида қайд этилганидек, Украинанинг тўлов балансини қоплашга хизмат қилади”.
Тегишли қарор тасдиқланганидан сўнг, пул 12 ой ичида 600 миллион евродан иборат икки траншда Киевга ўтказилади.
Эслатиб ўтамиз, аввалроқ Германия канслери Олаф Шолс Украина президенти Донбассга алоҳида мақом беришга тайёрлигини айтгани хабар қилинганди.
Насиба Тўхтаева
