Россия 24 февралгача Украинага бостириб киради — Байден
АҚШ раҳбари разведка маъдумотларига таянаётганини маълум қилган.
Жозеф Байденнинг сўзларига кўра, Путин Украинага бостириб кириш бўйича қарор қабул қилган. Бу ҳақда у 18 февраль куни журналистлар олдидаги чиқишида маълум қилган.
Байден Путиннинг нияти қатъий эканига аминлигини айтган. Шу билан бирга Россия агрессияси юз бермас экан, дипломатия имконият сифатида сақланиб қолишини таъкидлаган.
АҚШ раҳбарининг бу сўзларига асос борлиги ҳақидаги саволга Байден "Бизда сезиларли разведка салоҳияти бор", — деб жавоб берган.
Президентнинг сўзларига кўра, Москва яқин кунларда Украинага ҳужум қилади. "Россия кучлари ҳозирда Украинани Беларусь тарафдан, рус-украин чегараси ва жанубда Қора денгизгача ўраб олди", — дея қайд этган у.
Байден келгуси ҳафтада уруш бошланиши мумкинлиги ва Россия мақсади Киевни эгаллаш эканини таъкидлаган. Шунингдек, унинг сўзларига кўра, ҳужум 24 февралгача, яъни Сергей Лавров ҳамда Энтони Блинкен учрашувигача амалга оширилади. Байден уруш бошланган тақдирда "Россия жуда катта товон тўлаши" мумкинлигидан огоҳлантирган.
Эслатиб ўтамиз, аввалроқ БМТ бош котиби Россия-Украина урушига ишонмаслигини маълум қилганди.
Жаҳонгир Қўзиев
