Тошкентда “Спарк” автомобили метро ичига тушиб кетди
Ҳолат бўйича “Тошкент метрополитени” расмий баёнот берди.
Кеча, 26 февраль куни тунги соат 23.30 атрофида “Шаҳристон” метро бекатининг чорраҳага яқин қисмида “Спарк” автомобили метронинг кириш қисмига тушиб кетган. Ҳодисага ҳайдовчининг транспорт бошқарувини йўқотиши сабаб бўлган.
Воқеа жойига тиббиёт ходимлари етиб келишган ва жабрланувчилар шифохонага олиб кетилган.
“Ҳолат юзасидан батафсил маълумотни дастлабки суруштирув ишлари якунига етгач, маълум қиламиз”, дейилган расмий хабарда.
Аввалроқ “Мирзо Улуғбек” метро бекатида сирдарёлик эркак ўзини поезд тагига ташлагани ҳақида хабар берилганди.
Жавоҳирбек ТУРСУНОВ
