Тошкентда 20 минг долларлик гиёҳвандлик воситаси сотувчиси ушланди
Жиноий гуруҳнинг яна икки нафар аъзоси қўлга олинган.
5 март куни Чилонзор туманида ўтказилган тезкор тадбир давомида гиёҳвандлик воситаларининг ноқонуний муомаласи билан боғлиқ ҳолат аниқланди. Бу ҳақда ИИВ ахборот хизмати хабар берди.
Маълум қилинишича, асли сурхондарёлик бўлган шахс ўзининг Нексия русумли автомашинасида келиб, харидорга 20 минг доллар эвазига 1 кг “опий” гиёҳвандлик моддасини сотаётган вақтида ашёвий далиллар билан қўлга олинган. Жиноий гуруҳнинг яна икки нафар аъзоси ўзларининг Кобальт русумли автомашинасида қочишга уринган пайтида ушланган.
Шундан сўнг мазкур шахсларнинг Чилонзор тумани “Кичик ҳалқа йўли” кўчасида жойлашган вақтинча яшаш манзили текширилган. Тинтув давомида гумонланувчиларга тегишли бўлган спорт сумкасининг ичидан 48 грамм “гашиш” гиёҳвандлик моддаси ашёвий далил сифатида олинган.
Гиёҳвандлик моддаларининг барчаси белгиланган тартибда расмийлаштирилиб, ҳозирда уларнинг манбасини аниқлашга қаратиган қидирув тадбирлари давом этмоқда.
Аввалроқ сурхондарёлик ҳайдовчининг Ўзбекистонга 97 кило гиёҳвандлик воситаларини олиб киришга урингани хабар қилинганди.
