Сурия изоляциядан чиқмоқда: Башар Асад БААга борди
У Дубай ва Абу-Даби раҳбарлари билан музокара ўтказган.
Сурия президенти Башар Асад 2011 йилдан буён илк марта БААга ташриф буюрди. Бу ҳақда “AP” хабар берди.
Асад Абу-Даби валиаҳд шаҳзодаси Муҳаммад бин Зайд ал Наҳайён билан музокара ўтказган. Муҳаммад бин Зайд ал Наҳайён Сурия раҳбарининг ушбу ташрифи Сурия ва минтақадаги тинчликка асос бўлишига умид билдирган. Шунингдек, у Дамашқнинг араб дунёси хавфсизлигидаги энг муҳим давлат эканини таъкидлаган.
Башар Асад ўз давлатидаги сўнгги ўзгаришлар тўғрисида маълумот берган. Шунингдек, у мамлакат ҳудудий яхлитлиги ва хорижий қўшинларни олиб чиқишни муҳокама қилган.
Бундан ташқари, Асад Дубай ҳукмдори Муҳамад бин Рашид ал-Мактум билан ҳам учрашган. Ал-Мактум БАА бош вазири ҳисобланади.
Башар Асад сўнгги бор 2011 йилда араб давлатларига ташриф билан келган. Шундан кейин у халқаро изоляцияга тушиб қолди. Асад 2011-2021 йилларда фақат Эрон ва Россияга ташрифлар амалга оширган.
Эслатиб ўтамиз, аввалроқ Сурия саноати 10 йиллик урушда қанча зарар кўргани маълум қилинганди.
