Имрон Хон Зеленксийга нима учун миннатдорчилик билдирди ?
Зеленский Покистон бош вазири билан телефон орқали суҳбатлашди.
Покистон бош вазири Имрон Хон Украина президенти Владимир Зеленский билан телефон орқали суҳбатда Украина можаросининг тезроқ тинч йўл билан ҳал этилишига умид билдирди. Бу ҳақда "Pakistan Today" газетаси хабар берди.
“Имрон Хон Владимир Зеленский билан телефон орқали суҳбатда Украинадаги жанговар ҳаракатлар давом этаётганидан чуқур таассуф билдирди ва Покистоннинг бу мамлакатдаги можарони диалог ва дипломатия йўли билан зудлик билан ҳал этиш тарафдори бўлган принципиал позициясини тасдиқлади”, — дейилади хабарида.
Покистон ҳукумати раҳбари суҳбатда аввалроқ Исломободда бўлиб ўтган Ислом ҳамкорлик ташкилоти Ташқи ишлар вазирлари кенгашининг 48-сессиясида Украинадаги вазият бўйича Москва ва Киев ўртасидаги мулоқотни ривожлантиришга тайёрлигини билдирган эди.
“Покистон каби блокка кирмаган давлатлар Украинада дипломатик ечим топиш ва ҳарбий ҳаракатларни тўхтатишда ижобий роль ўйнаши мумкин”, - деди Имрон Хон.
Унинг сўзларига кўра, Украинадаги можаро ривожланаётган мамлакатларга салбий иқтисодий таъсир кўрсатиб, нефть ва хом ашё нархи ошишига сабаб бўлмоқда. Шунга қарамай, Покистон Украинага инсонпарварлик ёрдамини давом эттиришга тайёр.
Имрон Хон, шунингдек, президент Зеленскийга Украина шарқидаги уруш зоналаридан покистонлик талабалар, фуқаролар ва дипломатларни эвакуация қилишда Украина ҳукумати томонидан кўрсатилаётган ёрдам учун миннатдорчилик билдирди.
Аввалроқ, Ироқ Сурия билан чегарани кучайтирмоқчи эканлиги ҳақида хабар берилганди.
