Тугади: Германия омборларида қуроллар кам қолганлиги маълум бўлди
Шу сабаб Берлин Украинага ҳарбий техника етказиб беролмаслиги мумкин.
Бундесвер омборларида қуроллар сони сезиларли даражада камайди. Бу ҳақда Германия ташқи ишлар вазири Анналена Бербок маълум қилди.
Бербокнинг сўзларига кўра, бу Украинага қурол етказиб беришни қийинлаштиради. Унинг қўшимча қилишича, логистика, таъмирлаш ва қуроллардан фойдаланишни ўқитиш тизими масаласи ҳам оғирлашган.
“Биз шу кунга қадар етказиб бермаган тизимларимизни кўриб чиқмоқдамиз. Аммо бундесвернинг ўзида улар жуда кам қолган”, – деган дипломат.
Бундан ташқари Бербок етказиб бериладиган қуроллар қанчалик эски бўлса, унинг логистикаси ва фойдаланиш тизими шунчалик қийин бўлади. Шу билан бирга Германия ТИВ раҳбари бу Киевнинг илтимоси инкор этилишини англатмаслигини ва Евроиттифоқ, НАТО ва “катта еттилик”даги ҳамкорлар билан бирга кўриб чиқилиши лозимлигини айтган.
Аввалроқ Украина ташқи ишлар вазири Дмитрий Кулеба Россия билан низони ҳал этишда дипломатия фойда бермаслигини маълум қилганди.
