Украина делегацияси Вашингтонга боради
Унинг таркибида иқтисод ва молия сектори раҳбарлари бор.
Украина бош вазири Денис Шмыгаль бошчилигидаги делегация кейинги ҳафта АҚШга боради. Бу ҳақда Reuters агентлиги хабар берди.
Агентлик маълумотларига кўра, делегация "Катта еттилик" молия вазирлари билан икки томонлама музокара ўтказади. Шунингдек, улар 21 апрелда ўтказиладиган Жаҳон банкининг Украина бўйича "думалоқ столи" да иштирок этади.
Делегация таркибига бош вазирдан ташқари, молия вазири Сергей Марченко, Украина миллий банки раҳбари Кирилл Шевченко ва бошқалар киритилган. Бу мамлакат молия секторининг Россия-Украина можароси бошланганидан кейинги илк ташрифи бўлади. Reuters'нинг таъкидлашича, музокаралар якунига кўра Халқаро валюта жамғармаси глобал иқтисодий ўсиш кўрсаткичларига ўзгартириш киритади.
Аввалроқ Жаҳон Банки Украина иқтисодиёти 45 фоизга қисқаришини маълум қилганди.
