Имрон Хонга қарши фитна бўлмаган — Покистон миллий хавфсизлик қўмитаси
Аввалроқ собиқ бош вазир АҚШни ўзига қарши ҳаракатларда айблаганди.
Покистон миллий хавфсизлик қўмитаси собиқ бош вазир Имрон Хоннинг лавозимидан четлаштиришда хорижий давлатлар иштироки бўлмаганини маълум қилди.
Бу ҳақда янги ҳукумат раҳбари Шаҳбоз Шариф администрацияси тарқатган пресс-релизда сўз боради. Шариф 22 апрель куни Миллий хавфсизлик қўмитаси йиғилишига раҳбарлик қилган. Унда март ойи охирида Покистоннинг Вашингтондаги элчихонасига келиб тушган телеграмма муҳокама қилинган.
Мамлакатнинг АҚШдаги собиқ элчиси Асад Мажид Хон йиғилиш қатнашчиларини бу телеграмма мазмуни билан таништирган. Бундан олдин ушбу мактубда Қўшма Штатлар расмийларининг Имрон Хон ҳукуматига қарши таҳдидлари ёзилгани тўғрисида хабарлар тарқалган.
"Миллий хавфсизлик қўмитаси телеграмма мазмунини ўрганиб, таҳлил қилган ҳолда ҳеч қандай чет эл фитнаси бўлмагани тўғрисида хулосага келди", — дейилади пресс-релизда.
Имрон Хон 10 апрель куни лавозимидан четлатилади. У Покистон тарихида ишончсизлик вотуми эълон қилинган биринчи бош вазир. Истеъфодан олдин у АҚШ ва маҳаллий мухолифат унга таҳдидлар билан тўла мактуб ёзганини эълон қилганди.
Аввалроқ Вашингтон Исломободда ҳукумат алмашганига муносабат билдирганди.
