Қашқадарё ва Сурхондарё вилоятларида кучли сел оқими кузатилди

 

Бугун, 3 май куни республиканинг айрим ҳудудларида кучли ёғингарчилик, сел оқими ва сув тошқинлари юзага келди. Бу ҳақда ФВВ ахборот хизмати хабaр берди.

 

Қайд этилишича, Қашқадарё вилоятининг Шахрисабз туманидаги “Ҳисорак” ҚФЙ ҳудудида ёғиб ўтган ёғингарчилик тепаликлардан қум аралаш шағалларни ички йўлларга ювиб туширган. Ҳодиса оқибатида аҳоли хонадонлари, уларнинг мулкларига зиён етмаган.

 

Сурхондарё вилояти Бойсун туманида қисқа муддатли ёғиб ўтган ёмғир ёғиши оқибатида туманнинг “Мачай”, “Юқори Мачай” ва “Дарбанд” қишлоғида қисқа муддати сел оқими кузатилган. Сел сувлари “Тошкент-Термиз” халқаро автомобил йўлига тошган.

Шунингдек, Сариосиё тумани тоғли ҳудудининг “Хонжиза” МФЙ ҳудудидан оқиб ўтувчи “Хурсандсой” сойида сув ҳажми ортиб, сой четига ўрнатилган 2 дона, 110 кВт кучланишли метал конструкцияли устунлар остини ювиши оқибатида ушбу устунларни ёнбошга йиқилишига олиб келган. Айни вақтда ушбу электр устунларини демонтаж қилиш ишлари олиб борилмоқда. Ҳозирда хавфсизлик нуқтаи назардан вақтинчалик электр таъминотидан узилган. 

 

Шу билан бирга, “Сангардак” сойи тепаликларидан оқиб тушган ёмғир сувлари тупроқ ва қум-шағалларни ички йўлларга оқизиб келган. Йўлларда тўпланган лойқа ва қум-шағаллар махсус муҳандислик техникалари  ёрдамида тўлиқ бартараф этилган.