Ўзбекистонда Халқаро қишлоқ хўжалиги университети ташкил қилинди

 

Кеча, 7 май куни “Халқаро қишлоқ хўжалиги университетини ташкил қилиш чора-тадбирлари тўғрисида”ги Президент қарори қабул қилинди.  

 

Унга кўра, Буюк Британия Қироллик қишлоқ хўжалиги университети (Royal Agriculture University) билан ҳамкорликда Тошкент шаҳрида Халқаро қишлоқ хўжалиги университети ташкил этилди.

 

Университет Қишлоқ хўжалиги вазирлиги ва Буюк Британия Қироллик қишлоқ хўжалиги университети томонидан таъсис этиладиган тўлиқ академик ва молиявий мустақил бўлган давлат иштирокидаги олий таълим муассасаси ҳисобланади.

 

Университетда таълим грант ва тўлов-контракт асосида амалга оширилади.

 

2022/2023 ўқув йилидан бошлаб олийгоҳда ақлли қишлоқ хўжалиги, агрономия, биотехнология, агроиқтисодиёт, чорвачиликни ривожлантириш, озиқ-овқат хавфсизлиги, агрологистика каби бакалавриат таълим йўналишлари ташкил этилади. Университет битирувчиларига ҳамкор университетнинг дипломи берилади.

 

Қарорга кўра, Университетда давлат муассасаси шаклидаги Қишлоқ хўжалиги соҳасида кадрларни қайта тайёрлаш ва уларнинг малакасини ошириш тармоқ маркази (Capacity Building Center) ташкил этилди. 

 

Шунингдек, 2022 йил якунигача талабалар, магистрант ва илмий изланувчилар ҳамда профессор-ўқитувчиларнинг илмий ишланмалари асосида стартап-лойиҳаларни яратиш ва амалиётга татбиқ этиш билан шуғулланувчи давлат муассасаси шаклидаги “Agro Innovation Incubator” маркази ташкил этилади.

 

Эслатиб ўтамиз, аввалроқ Президент Шавкат Мирзиёев видеселектор йиғилишида Ўзбекистонда Халқаро қишлоқ хўжалиги университетини ташкил этиш режалаштирилганини маълум қилганди. Давлат раҳбари янги университет учун чет эллик ўқитувчиларни жалб қилиши кераклигини алоҳида таъкидлаганди.