"Нефть-газ тармоғига инвестициялар зарур" — "Saudi Aramco" раҳбари
Дунёнинг энг йирик нефть компанияси директори “яшил” энергетикага ўтиш режасини қайта кўриб чиқишга чақирди.
Энергетика бозоридаги вазият “яшил” энергетикага ўтиш режасини қайта кўриб чиқишни талаб қилмоқда. Бу ҳақда Саудия Арабистонининг "Saudi Aramco" миллий нефть компанияси раҳбари Амин Носир маълум қилди.
“Жорий инқироз бутун дунёда нефть ва газ қазиб олишда захира қувватларининг етишмаётганини кўрсатади. 2050 йилга келиб, тўлиқ “яшил энергетика”га ўтишни ўрнига, биз дунёни янада кўпроқ кўмирдан фойдаланишга мажбур қиляпмиз ва энергетика хавфсизлик, нархларнинг мақбуллиги ҳамда энерготашувчиларнинг мавжудлигига эътибор қаратмаяпмиз”, – деган у "Financial Times" нашрига берган интервьюсида.
Носирнинг қўшимча қилишича, нархлар тушган тақдирда ҳам нефть қазиб олиш ҳажми кунига 100 миллион баррелдан ошмайди. Шу билан бирга у бозордаги барқарорликни сақлаб қолиш учун нефть-газ тармоғига инвестиция киритиш зарурлигини таъкидлаган.
Аввалроқ Саудия Арабистони янги OPEC+ келишувини тайёрлаётгани тўғрисида хабар берилганди.
