Тошкентда автомактаб раҳбари 1000 доллар пора билан ушланди
У фуқарога 3 ойлик ўқув курсида қатнашмасдан “права” олишига ёрдам бермоқчи бўлган.
Тошкент шаҳри Миробод туманида ҳайдовчилик гувоҳномасини олиб беришни ваъда қилган ўқув ташкилоти раҳбари пора билан ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Департамент ҳамда ИИБнинг Миробод туман бўлимлари томонидан тезкор тадбир ўтказилган. Унда “Ватанпарвар” ташкилоти “Чилонзор ўқув спорт техника клуби” унитар корхонаси бошлиғи Ф. Э. фуқаро Ж. га “С” тоифадаги ҳайдовчилик гувоҳномасини олиш учун 3 ойлик ўқув машғулотларида қатнашмасдан, ўқиганлик ҳақидаги гувоҳномани тайёрлаб бериши эвазига дастлаб 1,5 (млн) сўмни қўлга киритиб, қолган 1000 АҚШ долларини олган вақтида ашёвий далиллар билн ушланган.
Мазкур ҳолат юзасидан ЖКнинг 192-9-моддаси (тижоратда пора эвазига оғдириб олиш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, бундан олдин Самарқанд вилоятида фуқароларга имтиҳонларсиз ҳайдовчилик гувоҳномасини олиб беришни ваъда қилган автомактаб ходими 3 млн сўм пора билан қўлга тушганди.
