АҚШ Тайванда статус-квони сақлаб қолишни таклиф қилди
Пентагон раҳбари орол масаласида Вашингтон позициясини очиқлаган.
АҚШ Тайвань бўғозидаги ҳозирги ҳолатни сақлаб қолиш ниятида. Бу ҳақда Пентагон раҳбари Ллойд Остин маълум қилди.
"Биз шу кунга қадар минтақага катта фойда келтирган статус-квони сақлаб қолиш ниятидамиз. Биз ягона Хитой тамойилига содиқмиз, аммо мавжуд ҳолатнинг бир томонлама ўзгартирилишига қаршимиз. Тайвань мустақиллигини қўллаб-қувватламаймиз. Бизнинг сиёсатимиз ўзгармади. Аммо, афсуски, Хитой ҳақида бундай деб бўлмайди", — деган у.
Мудофаа вазирининг қўшимча қилишича, Тайвань яқинида провокацион ва беқарорлаштирувчи ҳаракатлар кўпайиб бормоқда. У ХХРнинг сиёсати Ҳинд-Тинч океани минтақасидаги хавфсизликка барҳам бериши мумкинлигидан хавотир билдирган.
"Мен шуни алоҳида таъкидлашни истайман: биз низога интилмаяпмиз. Шунингдек, янги "совуқ уруш", Осиё НАТОси ёки минтақанинг душман блокларга бўлиниб кетишини истамаймиз", — деб қайд этган Остин.
Маълумот ўрнида: Тайвань 1949 йилдан буён амалда ХХРдан мустақил сиёсат олиб боради. У Хитойнинг ажралмас қисми эканини бутун дунё, жумладан, АҚШ ҳам тан олади. Шу билан бирга аксарият давлатлар Тайваннинг Хитой таркибига зўравонликсиз ва куч ишлатишсиз қайтиши зарурлигини таъкидлаб келади.
Аввалроқ АҚШ Тайвань билан савдо жараёнини соддалаштириши тўғрисида хабар берилганди.
