АҚШ Украинадан ғалла олиб чиқишнинг қўшимча йўлларини қидирмоқда
Бу ҳақда Давлат департаменти маълумот берди.
АҚШ Украинадан ғалла олиб чиқишнинг муқобил йўлларини қидирмоқда. Бу ҳақда Давлат департаменти матбуот котиби Нед Прайс маълум қилди.
"Биз тўхтовсиз равишда Украинага чегара ўтказиш пунктларидан кўпроқ дон олиб чиқишнинг қўшимча йўлларини топишда, бунга тезкор техникаларни жалб қилиш, шунингдек, ушбу донни вақтинчалик сақлаш масаласида ёрдам беряпмиз", — деган у.
Прайс Россияни озиқ-овқат хавфсизлиги масаласида позициясини юмшатишга чақирган.
"Россия позициясида ўзгариш бўлмас экан, биз Украина билан ишлашда давом этамиз ҳамда Туркия ҳукумати ва БМТ Бош котибининг муқобил режаларини қўллаб-қувватлаймиз", — деб қўшимча қилган амалдор.
Аввалроқ Вашингтон Лотин Америкаси давлатлари билан глобал озиқ-овқат танқислигига қарши курашмоқчи эканлиги тўғрисида хабар берилганди.
