Самарқандлик фуқаро давлатга 3,5 млрд сўмлик зарар етказди
У оҳак пишириш печларида табиий газдан ноқонуний фойдаланган.
Самарқанд вилоятининг Каттақўрғон туманида табиий газдан ноқонуний фойдаланиш ҳолати аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Қайд этилишича, Департаментнинг Каттақўрғон туман бўлими ҳамда “Ҳудудгаз Самарқанд” газ таъминоти филиали мутахассислари ҳамкорлигида терговга қадар текширув ўтказилган. Унда “Мирзо Улуғбек” МФЙ ҳудудидаги нотурар бинода фуқаро С. Х. газлаштириш учун ҳужжатларни расмийлаштирмасдан, табиий газ тармоғига ноқонуний уланиб, 4 дона оҳак пиширишга мўлжалланган қўлбола ясалган печларга 10 дона ностандарт газ ёндиргичларини ўзбошимчалик билан ўрнатиб ишлатганлиги аниқланган. Бунинг натижасида давлат ва жамият манфаатларига 3,5 млрд сўм зарар етказилган.
Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.
Эслатиб ўтамиз, бундан олдин Навоий вилоятидаги оҳак ишлаб чиқариш цехида табиий газдан ноқонуний фойдаланиш ҳолати аниқланганди. Оқибатда давлат ва жамият манфаатларига 295 млн сўмлик зарар етказилган.
