Европанинг барча давлатлари Украинанинг ЕИга номзод бўлишидан хурсанд эмас
Бунга Киевнинг низо иштирокчиси эканлиги сабаб бўлмоқда.
Европанинг айрим давлатлари Украинага Евроиттифоқка аъзоликка номзод мақоми берилишига шубҳа билан қарамоқда. Бу ҳақда ЕИдаги манбаларига асосланиб The Washington Post хабар берди.
Хусусан, Дания, Нидерландия ва Польша дастлаб бу масалада ишончсизлик билан муносабатда бўлган. Европа дипломатлари эса Украинанинг номзодлик мақомига хавотир билдирган. Улар мамлакат низо ҳолатида бўлгани учун буни “нореал” деб ҳисоблаган.
Бундан ташқари, айрим сиёсатчилар унча бадавлат бўлмаган давлатни иттифоққа қабул қилинишига қарши чиққан. Бунинг сабаби Киев ЕИ аъзосига айланган тақдирда ундаги энг қашшоқ давлат бўлиши мумкин. Бу эса бошқаларнинг украинага субсидия ажратишига олиб келади.
Шу билан бирга аста-секин Киевни Евроиттифоққа аъзоликка номзод бўлишини қўллаб-қувватлаш кучайиб борган. ЕИнинг айрим давлатлари ҳамон хавотирда бўлса-да, улар умумий консенсусга қарши боришни истамаяпти.
Аввалроқ Грузия Украинани ўзининг Европа Иттифоқига қўшила олмаётганида айблаганди.
