Нидерландия вазири: Газ инқирози бутун Европани қамраб олиши мумкин
ЕИда газ захиралари камайиб бормоқда.
Европанинг алоҳида олинган давлатидаги газ инқирози бутун қитъага тарқалиши мумкин. Бу ҳақда Нидерландия иқлим ва энергетик сиёсат вазири Роб Йеттен маълум қилди.
“ЕИнинг айрим давлатлари 1 ноябрга қадар ўз газ омборларини тўлдири олгани яхши, аммо бошқалар 80 захираларни тўплай олмаса, домино эффекти бутун Европага тарқалади”, — деган у.
Вазир Россия гази Нидерландияга келиши тўхтаган тақдирда, унинг мамлакати бошқалар билан ҳамжиҳат бўлишини таъкидлаган. Шу билан бирга Йеттен мамлакат кўмирдан кўпроқ фойдаланишини маълум қилган.
Сўнгги вақтларда Россиядан Европага етказиб бериладиган газ ҳажми камайди. Бунга айрим тармоқларнинг таъмирланиши сабаб қилиб кўрсатилган. Айрим таҳлилчилар Москва энергетикадан қурол сифатида фойдаланишни бошлаганини қайд этган.
Аввалроқ Германия газ захираларини кўпайтириш учун 15 миллиард евро ажратиши тўғрисида хабар берилганди.
