Ўзбекистон чегарада тиббий назоратни кучайтирди
Бу Афғонистонда вабо аниқлангани билан боғлиқ.
Ижтимоий тармоқларда Афғонистоннинг икки вилоятида бир кунда 40 га яқин одам вабодан вафот этгани ҳақида хабарлар тарқалди. Ўзбекистондаги ҳолат юзасидан Санитария-эпидемиология хизмати маълумот берди.
Қайд этилишича, Вабо – vibrio cholerae микроорганизми келтириб чиқарадиган, ўткир инфекция. Касаллик диарея билан кечади, бу сувсизланиш ва қон томирлари етишмовчилигини келтириб чиқаради. Кўпинча инфекция ифлосланган сув ёки денгиз маҳсулотлари орқали юқади.
Ўзбекистон Республикасида Санитария-эпидемиология хизмати томонидан кенг доирада олиб борилаётган тадбирлар аҳолини санитария-эпидемиологик осойишталигини таъминлашга йўналтирилган.
Республика бўйича амалга оширилаётган профилактик ва эпидемияга қарши самарали тадбирлар натижасида ўлат, сариқ иситма, вирусли геморрагик иситмалар, парранда гриппи каби карантин ва ўта ҳавфли юқумли касалликлар, жумладан вабо касаллигини республика ҳудудига четдан кириб келиши ва аҳоли ўртасида тарқалиб кетишига йўл қўйилмаган.
Республикада вабо касаллигини тарқалишини ва келиб чиқишини олдини олиш юзасидан чоралар кўрилмоқда. Хусусан, республика бўйича бугунги кунда давлат чегараларини кесишиш жойларида 54 та санитария – карантин пунктлари (кейинги ўринларда – СКП деб юритилади) фаолият кўрсатиб келмоқда, шулардан 36 таси автомагистрал йўлларида, 11 таси Ҳалқаро аэропортларида, 6 таси темир йўл ва 1 таси дарё портида ташкил этилган
Ўзбекистон Республикаси ҳудудига чегарадан кириб келаётган йўловчиларни тиббий – санитария кўригини яхшилаш мақсадида барча Халқаро аэропортлар ва автомагистрал йўлларда жойлашган йўловчи ўтиш оқими юқори бўлган СКПлар замонавий тепловизорлар ва контактсиз термометр (пирометр)лар билан етарлича таъминланган.
Юқумли касалликлар шифохоналарида, орал-регидратация пунктларида ўткир диареяга чалинган беморларни Соғлиқни Сақлаш Вазирининг амалдаги буйруқлари талаблари асосида вабога текширилиши ташкил этилган. Касалликнинг мавсумида ҳар беморлар юзасидан чуқур эпидемиологик суриштирув ишлари ўтказилмоқда.
Санитария-эпидемиология хизматининг махсус лабораториялари вабо касаллигини ташхисоти бўйича керакли жиҳозлар, реактивлар ва озуқа муҳитлари билан етарли миқдорда таъминланган. Шунингдек, давлат чегара-божхона постларидаги санитария-карантин пунктлари томонидан касалланиш тарқалган қўшни далватлардан ташриф буюрадиган фуқароларнинг тиббий назорати кучайтирилган.
