Арманистон кучлари Қорабоғни сентябрда тўлиқ тарк этади
Аввалроқ Илҳом Алиев Ереванни 2020 йилги келишувни бузишда айблаганди.
Арманистон хавфсизлик кенгаши котиби Армен Григорян арман қўшинларининг Қорабоғни бутунлай тарк этиши муддатини маълум қилди.
“Уруш туфайли Арманистон Қуролли кучлари бўлинмалари Қорабоғга кирган. Ўт очиш режими ўрнатилганидан сўнг улар мамлакатга қайтмоқда. У тугалланиш арафасида ва қўшинлар минтақани сентябрда бутунлай тарк этади”, – деган у “Арменпресс” нашрига берган интервьюсида.
Сиёсатчи шундан кейин Ереван Тоғли Қорабоғга бошқа қўшин жўнатмаслигини қўшимча қилган.
Озарбайжон президенти Илҳом Алиев 15 июль куни Арманистонни уч томонлама шартномани бузишда айблади. Бу келишувга кўра, Тоғли Қорабоғга 1960 рус тинчликпарвар кучлари кириши, арман ҳарбийлари эса уни тарк этиши белгиланган эди.
Аввалроқ ЕИ воситачилигида Арманистон ва Озарбайжон вакиллари учрашгани тўғрисида хабар берилганди.
