Тошкент метросида поезд тўхтаб қолди
Ҳолатга метрополитен расмий изоҳ берди.
Бугун, 21 июль куни ижтимоий тармоқда Тошкент метроси поезди тўхтаб қолгани акс этган видео тарқалди. Ҳолат юзасидан метрополитен расмий муносабат билдирди.
Маълум қилинишича, ҳаво ҳароратининг исиб кетиши сабаб Сергели йўли 1-бекатидан “Олмазор” метро бекати томонга секинлаштирилган тезликда ҳаракатланиб келаётган электропоезд метрода ўрнатилган светафорда қизил чироқ ёнгани сабаб 15 сония тўхтаб турган.
Бунга электродеподан “Олмазор” метро бекати томон яна бир поезд ҳаракатлангани сабаб бўлган. Ушбу поезд бекатни тарк этганидан сўнг навбатдаги маршрут ҳаракатланишни давом эттирган.
Эслатиб ўтамиз, бундан олдин Тошкент метросининг “Чилонзор” йўналишидаги иккита бекат оралиғида поезд техник носозлик сабаб тўхтаб қолганди.
