АҚШ "Толибон" билан музлатилган активлар бўйича музокара ўтказди
У Тошкентда бўлиб ўтган.
АҚШ давлат департаменти ва молия вазирлиги делегациялари Тошкентда толиблар билан музлатилган афғон захираларини муҳокама қилган. Бу ҳақда Қўшма Штатлар бош ташқи сиёсий идораси хабар тарқатди.
Музокаралар 27 июль куни ўтказилган. АҚШ томонига Афғонистон бўйича махсус вакил Томас Уэст ва молия вазири ўринбосари Брайан Нельсон бошчилик қилган.
"Томонлар Афғонистон марказий банки резервларининг 3.5 миллиард долларини афғон халқи фаровонлиги учун сарфланиши масаласини муҳокама қилди. Қўшма Штатлар бу йўналишдаги ишларни тезлаштириш зарурлигини таъкидлади", — дейилади давлат департаменти баёнотида.
Тошкентда 25-26 июль кунлари бўлиб ўтган "Афғонистон: хавфсизлик ва иқтисодий тараққиёт" халқаро конференцияси доирасида музлатилган афғон активларини қайтариш масаласи бир неча бор кўтарилган. Масалан, РФ президентининг Афғонистон бўйича махсус вакили Замир Кабулов бу захираларни қайтариш зарурлигини қайд этган.
Аввалроқ Афғонистонда ИШИД жангарилари сони уч баробар кўпайгани тўғрисида хабар берилганди.
