25 минг одам вазир ва ҳокимлардан норози
Шавкат Мирзиёев раислигида давлат хизматини ислоҳ қилиш бўйича видеоселектор йиғилиши ўтказилмоқда.
"Бугунги мавзу 30 йилдан бери кейинга сурилиб келаётган масалалар ечимига қаратилган. Гап 35 миллион аҳолимизнинг ҳаётини енгил қиладиган, кайфиятига бевосита таъсир кўрсатадиган – давлат хизматини ислоҳ қилиш ҳамда бошқарувда натижадорлик ва сифатни ошириш ҳақида бораяпти", — дейди давлат раҳбари йиғилиш аввалида.
Таъкидланишича, бу соҳада 118 минг киши меҳнат қилмоқда. Сўнгги йилларда давлат хизматчилари халққа анча яқинлашган, "маҳаллабай" ва "хонадонбай" ишлаш тизими йўлга қўйилган. Ходимларга самарали ишлашлари учун муносиб шароитлар яратилган.
Натижада, давлат хизматида 40 ёшгача бўлган ходимлар улуши 61 фоизга етган (илгари 37 фоиз бўлган).
"Лекин, ҳали давлат хизмати чинакам халқни рози қиладиган тизимга айлангани йўқ", — дейди Президент.
Мисол учун, ўтган йили Халқ қабулхоналарига вазирлик ва ҳокимликлар ходимларининг билимсизлиги ва масъулиятсизлиги ҳақида 25 мингта, уларнинг мулоқот маданияти етишмаслиги билан боғлиқ 7 мингта шикоят келиб тушган. Энг кўп шикоятлар Соғлиқни сақлаш, Халқ таълими вазирликлари, Қашқадарё, Сурхондарё вилоятлари ҳокимликлари фаолияти билан боғлиқ.
