Эксперт: Ҳозирча Тайванни қўшиб олиш учун Хитойда имконият йўқ

 

Хитой Нэнси Пэлосининг Тайванга ташрифига қатъий жавоб бериш зарурлигини яхши англайди, аммо АҚШ билан тўғридан тўғри тўқнашувдан қочмоқда. Бу ҳақда Япониянинг Пекиндаги собиқ ҳарбий атташеси, Сасакава тинчлик фонди катта илмий ходими Бондзи Охара маълум қилди.

 

“АҚШ ва Хитой ўртасидаги қарама-қаршилик энг камида ташқи томондан кескинлашади. Пекин ўзининг кўп сонли огоҳлантиришларига қарамай, Тайванга келган Пэлоси ташрифига маълум маънода қатъий жавоб қайтариши керак”, – деган таҳлилчи “ТАСС” агентлиги билан суҳбатда.

 

Охара ХХРнинг орол яқинидаги ҳарбий машғулотлари ҳақида гапирар экан, уларнинг АҚШ вакили ташрифидан сўнг амалга оширилаётганига эътибор қаратган. У Пекиннинг Вашингтон билан ҳарбий тўқнашувдан қочаётганини таъкидлаган. Хусусан, Хитой томони Пэлоси каби юқори мартабали амалдорлар сафари пайтида кучли ҳарбий тайёргарлик чоралари кўрилишини яхши билади. Масалан, ҳозирда Тайвань шарқида Америка авиаташувчиларининг зарбдор гуруҳи тўпланган. Экспертнинг фикрича, хитойликларнинг ҳозирги машғулотлари АҚШга эмас, Тайванга қарши қаратилган.

 

“Ҳарбий томондан Хитой Тайванни қўшиб олиш бўйича етарли имкониятларга эга эмас. Бунинг учун катта миқдордаги тирик кучларни жалб қилган ҳолда йирик денгиз десанти амалиётини ўтказиш керак. Сўнгги вақтларда бу бўйича кўплаб машғулотлар ўтказилмоқда, аммо Фикримча, бу етарли эмас. Ҳозирги босқичда ҳатто қуруқлик қўшинлари техникасининг тўпланиши ҳам кузатилмаяпти”, – деб қайд этган Охара.

 

Маълумот ўрнида: Пэлоси 2 август куни Тайванга борди. Бу расмий Пекиннинг кескин норозилигига сабаб бўлди. Хитой орол атрофини фуқаролик авиацияси учун ёпди. Тайванга қарши қатор санкциялар жорий этилди.

 

Бугундан ХХР қуролли кучлари Тайвань атрофидаги олти ҳудудда йирик ҳарбий машғулотлар бошлади. Бу “мисли кўрилмаган” машқлар бўлиши айтилмоқда. Хусусан, илк бор орол яқинида ракета отилади. Бундан ташқари, DF-17 гипертовушли ракеталари қўлланилиши кутилмоқда.