Экспертлар Байдендан Киевга 300 километрга учадиган ракета беришни сўради
Давлат департаменти бунга муносабат билдирди.
АҚШнинг 20 га яқин ташқи сиёсат ва мудофаа соҳасидаги экспертлари Жозеф Байденга мактуб йўллади. Унда Украинага 300 километрга учадиган ракеталарни беришга чақирилган.
“АҚШ Украинани кеч бўлмасдан қуроллантириш керак” номли мактуб The Hill нашрида эълон қилинган. Экспертларнинг фикрича, Вашингтон Киевга вазиятни сақлаб туриш учун етарли қурол бермоқда, аммо у Россия эгаллаб олган ҳудудларни қайтариб олиш учун камлик қилади.
Улар Оқ уйнинг янада кучлироқ қуролларни бермаслигига сабаб сифатида Москва билан тўғридан тўғри низога кириш хавфини кўрсатган.
“Бу каби керагидан ортиқ эҳтиёткорлик ташаббусни Владимир Путинга бермоқда ва Москвага босим кучсизланмоқда”, – дейилган мактубда.
Экспертлар етарли ҳарбий ва молиявий ёрдам кўрсатилган тақдирда Украина Россияни мағлуб этиши мумкинлигини қайд этган. Улар HIMARS реактив ўт очиш тизимларини кўпроқ етказиб беришни таклиф қилган. Бундан ташқари, ушбу тизимлар учун 300 километр узоқликка учадиган ATACMS ракеталарини бериш зарурлиги қайд этилган. Бу орқали бутун Украинадаги Россия марраларига зарба бериш имконияти пайдо бўлиши таъкидланган.
Мактуб Европадаги НАТО кучлари собиқ қўмондонлари Филипп Бридлав ва Уэсли Кларк, давлат департаментининг собиқ амалдорлари Курт Волкер, Пола Добрянски, Стивен Сестанович, АҚШнинг Россиядаги собиқ элчиси Александр Вершбоу ва бошқалар томонидан имзоланган.
Бунга жавобан Давлат департаменти расмий вакили Нед Прайс Вашингтон Киевга етарли миқдорда ёрдам берганини, аммо бу низо Украинадан ташқарига кенгаймаслиги тарафдори эканини айтган.
Аввалроқ Зеленский Қрим аҳолисини Россия ҳарбий объектларидан узоқроқда туришни сўраганди.
