АҚШ элчиси: Пэлосининг ташрифи Вашингтон-Пекин муносабатлари инқирозига сабаб бўлмаган
Дипломат кескинликнинг асл сабабини тахмин қилди.
Нэнси Пэлосининг Тайванга ташрифи Хитой-АҚШ муносабатларидаги инқирозга сабаб бўла олмайди. Бу ҳақда Вашингтоннинг Пекиндаги элчиси Николас Бернс CNN телеканалига берган интервьюсида маълум қилди.
“Фикримизча, АҚШ ва Хитой муносабатларида Конгресс вакиллар палатаси спикери Нэнси Пэлосининг Тайванга ташрифи туфайли инқироз бошланиши мумкин эмас. Бу инқироз Пекин томонидан атайин яратилди”, — деган дипломат.
Бернснинг фикрича, ХХР реакцияси ҳаддан ташқари “бўрттирилди”. У Хитой ҳукуматини келажакда тинч ҳаракат қилишга чақирган.
“Бутун дунё Хитойнинг Тайвань бўғозидаги беқарорлик манбайига айланганидан хавотирга тушган. Бу ҳеч кимнинг манфаатларига жавоб бермайди”, — деб қўшимча қилган элчи.
Маълумот ўрнида: Пэлоси 2 август куни Тайванга борди. Бу расмий Пекиннинг кескин норозилигига сабаб бўлди. Хитой орол атрофини фуқаролик авиацияси учун ёпди. Тайванга қарши қатор санкциялар жорий этилди.
Бундан ташқари, Пекин орол атрофида йирик машғулотлар ўтказди.
