Покистондаги тошқинлар гуманитар инқироз деб баҳоланди
Мамлакатда муссон ёмғирлари икки ойдан буён тинмаяпти.
Покистонда июнь ойидан буён давом этаётган муссон ёмғирлари гуманитар инқирозга олиб келди. Бу ҳақда мамлакат иқлим ўзгариши масалалари вазири Шерри Раҳмон маълум қилди.
“Ҳозир биз муссон оқимининг еттинчи даврини бошдан кечиряпмиз, оқибатда минглаб одамлар уйсиз қолди, 830 киши ҳалок бўлди ва 1348 нафар фуқаро жароҳатланди. Балужистондан муссон Синдга кўчди, унинг 30 тумани сув остида қолган. Ҳодисанинг кўламини шундан англаш мумкинки, Синдда ёмғир одатдагидан 395 фоиз, Балужистонда 379 фоизга кўп ёғган. Бу жуда катта иқлим ҳалокати, уни 2010 йилги тошқинлар оқибатлари билан солиштириш мумкин”, – деган у.
Шу билан бирга табиий офатдан азият чекканларга дарҳол ёрдам кўрсатишга чақирган.
Покистонда муссон ёмғирлари июндан буён давом этмоқда. У бутун мамлакатда йирик тошқинлар ва кўчкиларга сабаб бўлди. Ой бошида Исломобод фавқулодда ҳолат эълон қилди ҳамда БМТга гуманитар ёрдам сўраб мурожаат қилди.
Аввалроқ Ҳиндистонда 50 киши тошқин қурбони бўлгани ҳақида хабар берилганди.
