Блинкен: Россияга қарши босим давом этади
АҚШ давлат котиби Зеленский билан учрашди.
АҚШ Россияга қурол импортини чекламоқда ва унга босим ўтказишда давом этади. Бу ҳақда давлат котиби Энтони Блинкен маълум қилди.
Кеча Давлат департаменти раҳбари эълон қилинмаган ташриф билан Украинага борди ва Владимир Зеленский билан учрашди. Дипломатнинг қўшимча қилишича, Киевга қарши агрессия тўхтамагунча Вашингтон Россия бўйича сиёсатини ўзгартирмайди.
“Ҳозир Москва Шимолий Корея, Эронга ҳарбий ёрдам сўраб мурожаат қилмоқда, чунки биз уларнинг қурол импортига тизимли тўсиқ қўймоқдамиз ва бу босимни давом эттирамиз”, – деган Блинкен.
АҚШ бир неча бор Россиянинг Эрондан учувчисиз қурилмалар сотиб олганини таъкидлаган. Сўнгги кунларда эса Шимолий Кореядан миллионлаб снарядлар харид қилингани ҳақида хабарлар тарқалди. Пентагон ушбу маълумотларни тасдиқлаган.
Аввалроқ Украина 2022 йил охиригача Херсон вилоятини қайтариб олмоқчи эканлиги тўғрисида хабар берилганди.
