Россиялик миллиардер Украинага 1 миллиард доллар таклиф қилди
Бунинг эвазига у ўзига қарши санкцияларнинг бекор қилинишини сўраган
Россиялик миллиардер Михаил Фридман Украинага 1 миллиард доллар бериш эвазига ўзига қарши санкцияларни бекор қилишни сўради. Бу ҳақда Wall Street Journal хабар берди.
Маълумотларга кўра, бизнесмен шу орқали Буюк Британиянинг ўзига қарши жорий этган чекловларини бекор қилинишига эришмоқчи. WSJ’нинг қайд этишича, бу россияликлар томонидан берилаётган илк таклиф эмас. Бундан аввал кўплаб рус миллиардерлари ва йирик банклар махфий равишда ҳам шу каби таклифлар билан чиққан.
Фридманнинг ўзи юқоридаги хабарни инкор қилган бўлса-да, Буюк Британия ТИВ бунга ўз муносабатини билдирган.
“Буюк Британия санкцияларни четлаб ўтишга бўлган ҳаракатларга ён бермайди”, – дейилади вазирлик ахборотида.
Михаил Фридман Россиянинг “Альфа-банк”и акциялари назорат пакетининг эгаси ҳисобланади. У ва унинг ҳамкорлари ҳисобланган Петр Авен ҳамда Герман Хан Буюк Британия ва ЕИ санкциялари рўйхатига тушган. АҚШ эса банкни “қора рўйхат”га киритган.
Аввалроқ Австрия ТИВ Россияга қарши санкциялар олиб ташланиши мумкинлигини маълум қилди.
