Япония бош вазири: Ким Чен Ин билан учрашишга тайёрман
У КХДР билан муносабатларни нормаллаштириш муҳим эканини қайд этди.
Япония бош вазири Фумио Кисида Шимолий Корея етакчиси Ким Чен Ин билан учрашишга тайёрлигини билдирди. Бу ҳақда у БМТ Бош ассамблеясидаги чиқишида маълум қилди.
“Япония бош вазири Дзюнъитиро Коидзуми ва Шимолий Корея етакчиси Ким Чен Ир ўртасида Пхеньян декларацияси имзоланганига 20 йил бўлди. Унда эълон қилинган муаммоларнинг комплекс ечими ўзгармас бўлиб қолмоқда. Япония ҳар икки томонни қизиқтираётган масалаларни муҳокама қилишга тайёр. Шахсан мен ҳеч қандай шартларсиз Ким Чен Ин билан учрашишга тайёрман. Мен барча имкониятларни ишга солиб ҳамма ҳаракатларни амалга ошираман”, – деган у.
Пхеньян декларациясида ядро ва ракета дастурлари, икки давлат муносабатлари тарихидаги мураккаб давр ва алоқаларни яхшилашда давом этишга келишиб олинган. Ушбу ҳужжат 2002 йилда имзоланган.
Аввалроқ Ким Чен Ин ҳар қандай ҳолатда ҳам КХДР ядро қуролидан воз кечмаслигини айтганди.
