НАТО Украинани ҳимоя қиладими?
Германиянинг альянсдаги вакили бунга ойдинлик киритди.
Украина НАТО аъзо бўлмагани учун альянсда уни ҳимоя қилиш мажбурияти йўқ. Бу ҳақда Германиянинг НАТОдаги доимий вакили Рюдигер Кениг маълум қилди.
“Украина НАТО аъзоси эмас. Шунинг учун бу альянснинг иши эмас. Биз шунингдек, НАТОнинг ушбу можарода фаол қатнашишини ҳам истамаймиз. Акс ҳолда бу жуда катта урушга айланиб кетади ва блокка аъзо 30 давлат унга тортилади”, – деган дипломат.
Кениг альянс Россия билан урушни истамаслигини қайд этган. Шу билан бирга унинг сўзларига кўра, Европа давлати ҳужумга учраса, НАТО жим қараб тура олмайди.
30 сентябрь куни Владимир Зеленский Украинани НАТОга тезкор равишда аъзо бўлиши учун ариза топширилганини маълум қилди. Бунга Россия томонидан мамлакатнинг айрим ҳудудлари қўшиб олингани сабаб бўлган.
