Украина АҚШдан ўта замонавий қуроллар сўрамоқда
Украина парламенти раҳбари Конгрессга шу мазмунда мактуб ёзди.
Киев АҚШдан тактик баллистик ракеталар сўради. Бу ҳақда Украина Олий радаси раиси Руслан Стефанчукнинг АҚШ Конгрессига ёзган мактубида сўз боради.
Ҳужжатда келтирилишича, украиналиклар Жозеф Байден маъмуриятини Atacms ракеталарини тақдим этишга чақирган. Бу турдаги ракеталар 300 километр узоқликдаги нишонларга зарба бера олади.
Стефанчукнинг фикрича, Вашингтон тезкор тартибда NASAMS зенит-ракета тизимларини ҳам етказиб бериши керак. Бундан ташқари, Киев MQ-1C Gray Eagle учувчисиз қурилмасини ҳамда F-15 ва F-16 қирувчи самолётларини сўраган.
Бундан олдин Жозеф Байден ва Владимир Зеленский телефон мулоқотини ўтказганди. АҚШ президенти Украинага замонавий мудофаа тизимларини етказиб беришга ваъда берган.
