Риши Сунак яна бош вазир бўлишга уриниб кўради
Ўтган сафар у Лиз Трассга мағлуб бўлганди.
Буюк Британия собиқ молия вазири Риши Сунак яна бош вазирликка номзодини илгари сурди. Уни консерваторлар партиясининг 100 дан ортиқ депутати қўллаб-қувватлаган.
Собиқ вазир бошқа номзодлар 100 та овоз тўплай олмаса, автоматик тарзда ҳукумат раҳбарига айланади. Аммо бош вазирлик учун курашга Борис Жонсон ҳам қўшилиши мумкин. Ҳозирда фақатгина Вакиллар палатаси раҳбари Пенни Мордонт сайловда иштирок этишини эълон қилган.
Турли маълумотларга кўра, Жонсонни 67 депутат қўллаб-қувватлаши аниқ. Унинг иттифоқчиси Жеймс Даддриж собиқ бош вазир юзтадан ортиқ овоз тўплай олишига ишонишини айтган.
Жонсон Кариб оролларидаги таътилини бекор қилиб, Лондонга учиб келаётгани ҳақида хабарлар тарқалди.
Шу ҳафтада Лиз Трасс бош вазирликдан истеъфога чиқди. У 45 кун давомида ҳукуматни бошқарган. Сайловда айнан Риши Сунак Трасс хонимнинг асосий рақобатчиси бўлган.
Аввалроқ Буюк Британияда сайлов санаси маълум қилинганди.
