Блинкен: Россия ҳақиқатдан ҳам мулоқотни истаса, Украина ҳукумати билан гаплашсин
АҚШ Давлат котиби Байденнинг Путин билан музокара ўтказмаслиги сабабини очиқлади.
Жозеф Байден G20 саммитида Владимир Путин билан учрашмоқчи эмас. Бу ҳақда АҚШ Давлат котиби Энтони Блинкен маълум қилди.
“Россия ва Путин Украинадаги низони ҳал қилиш учун дипломатиядан манфаатдор эмас. Агар сермазмун дипломатия мавжуд бўлганда, биз бундан фойдаланган бўлардик. Аммо буни кўрмаяпмиз”, – деган дипломат CBC телеканалига берган интервьюсида.
Блинкен низони тугатиш масаласи бевосита Москва ва Киев ўртасида ҳал қилиниши зарурлигини таъкидлаган.
“Агар Россия ҳақиқатдан ҳам мулоқотни истаса, у украин ҳукумати билан музокара олиб бориши керак”, – деб қўшимча қилган Давлат котиби.
G20 давлат раҳбарлари саммити 15-16 ноябрь кунлари Балида бўлиб ўтади. Унда Путиннинг иштирок этиши масаласига ҳали аниқлик киритилмаган. Бундан олдин Индонезия томони Россия ва АҚШ етакчилари учрашувини ташкил этишга тайёрлигини айтганди.
