Москва Анқарани Сурия масаласида босиқликка чақирмоқда
Кеча Эрдоған Россияни Суриядаги мажбуриятларини бажармасликда айблаганди.
Сурияда эскалацияни кучайтирмаслик учун Туркия босиқлик кўрсатиши керак. Бу ҳақда РФ Президентининг Сурия бўйича махсус вакили Александр Лаврентьев маълум қилди.
Туркия армияси Сурия ва Ироқда “Чангал ва қилич” ҳарбий амалиётини ўтказмоқда. Амалиёт давомида курд бўлинмаларининг марраларига зарба берилган.
Лаврентьевнинг фикрича, курд масаласини ҳал қилиш учун умумий ечимни топиш зарур.
“Биз албатта, туркиялик ҳамкасбларимизни эскалацияни кучайтирмаслик учун босиқ бўлишга чақирамиз, нафақат Сурия шимолида, балки бутун мамлакатда кескинликнинг олдини олиш керак”, – деган дипломат.
Ражаб Тоййиб Эрдоған кеча Суриядаги ҳарбий амалиётни бошлашга русларнинг ўз мажбуриятларини бажармагани мажбур қилганини айтганди. Лаврентьев бунга жавобан Москва сўнгги ойларда Анқарани йирик операция ўтказишдан тийиб турганини таъкидлаган.
Аввалроқ Туркия Сурияда қуруқлик қўшинлари иштирокида ҳарбий амалиёт ўтказиши мумкинлиги тўғрисида хабар берилганди.
