Россиялик алпинист Наталя Наговицина ҳалок бўлгани расман эълон қилинди
Наговицина 12 август куни оёғини синдириб, 7200 метр баландликда қолиб кетган эди.
Қирғизистон алпинизм ва тоғқа чиқиш федерацияси президенти Эдуард Кубатов маълум қилишича, россиялик алпинист Наталя Наговицина вафот этган деб расман эълон қилинди.
2 сентябрь куни дрон ёрдамида икки маротаба амалга оширилган қидирув жараёнларида Наговицина ҳаёт изларига дуч келинмади. Шундан сўнг қутқарув операцияси тўхтатилгани билдирилди.
47 ёшли спортчи 12 август куни “Ғалаба” чўққисидан (7439 метр) тушиш вақтида оёғини синдириб, 7200 метр баландликда қолиб кетган. Унинг ёнида фақат оз миқдорда сув захираси бўлган.
Наговицинани қутқариш учун уч марта уриниш қилинган, бироқ барчаси муваффақиятсиз якунланган. Уларнинг бири давомида италиялик алпинист Лука Синижиглье ҳам ҳалок бўлган.
Кубатовнинг таъкидлашича, тарих давомида “Ғалаба” чўққисида бирорта ҳам муваффақиятли қутқарув амалиёти ўтказилмаган. Бу чўққи Ўрта Осиёдаги энг хавфли ва мураккаб кўтарилиш йўналишларидан бири ҳисобланади.
