Қирғизистон пойтахти Манас шаҳрига кўчирилиши мумкин

Қирғизистон ҳукумати мамлакат пойтахтини кўчириш масаласини яна кун тартибига чиқарди. Миллий хавфсизлик давлат қўмитаси раиси Қамчибек Ташиев бу борадаги таклифни рад этмади ва келгусида Манас шаҳри давлатнинг янги маъмурий марказига айланиши мумкинлигини билдирди.

 

Ташиевнинг сўзларига кўра, 2026 йилда Манасга республика аҳамиятидаги учинчи шаҳар мақоми берилиши режалаштирилган. У бу ташаббусни мамлакатнинг стратегик ривожланиши учун муҳим қадам сифатида баҳолади.

 

“Кўпчилик ‘Манас пойтахт бўлади’ деган фикрни илгари сурмоқда. Агар бунга тайёр бўлсак, нега йўқ? Аммо бу фақат ном эмас — бу катта масъулият. Шаҳар ва халқ бунга иқтисодий, инфратузилмавий ва маънавий жиҳатдан тайёр бўлиши керак,” — деди Ташиев.

 

Сўнгги ойлар давомида Манасда йирик қурилиш ва инфратузилма лойиҳалари амалга оширилмоқда. Янги маъмурий бинолар, йўллар ва ижтимоий объектлар барпо этилмоқда.

 

Маълумки, жорий йилнинг 17 сентябр куни Жалолобод шаҳри номи расман Манас деб ўзгартирилган, бу ўзгариш мамлакатда янги босқич ва миллий бирлик рамзи сифатида қабул қилинган эди.

 

Мутаҳассислар фикрича, агар Манас пойтахт мақомини олса, бу Қирғизистоннинг иқтисодий ва сиёсий марказини қайта шакллантириши ҳамда давлат бошқарув тизимига янги имкониятлар яратиши мумкин.