“Мен бундай суҳбатларга қизиқмайман” — Тоқаев

 

Қозоғистон президенти Қосим-Жомарт Тоқаев 27 декабрь куни Кремлда Россия президенти Владимир Путин ва Қозоғистоннинг биринчи президенти Нурсултон Назарбоев ўртасида бўлиб ўтган учрашувлар ҳақида «Туркистон» газетасига интервью берди. 

 

Давлат раҳбари таъкидлашича, ушбу учрашувлар мунтазам равишда ўтказиб келинади ва норасмий характерга эга. Тоқаевнинг сўзларига кўра, Путин дўстлари ва собиқ ҳамкасбларига нисбатан илиқ муносабат билан машҳур ва шанба куни оғир иш юкига қарамай, бемалол суҳбатлашиш учун вақт ажратган.

 

Тоқаев ушбу учрашувни Евроосиё интеграцияси доирасидаги тажрибали сиёсатчи сифатида Назарбоевнинг аҳамиятини яна бир бор тасдиқловчи самимий ва дўстона мулоқот деб баҳолади.

 

Давлат раҳбари сўзларини давом эттириб, ушбу учрашув Владимир Путиннинг юксак инсоний фазилатларидан далолат беришини таъкидлади.

“Мен бундай суҳбатларнинг мазмунига қизиқмайман; мен ҳеч қачон бу мавзу бўйича савол бермайман. Нурсултон Назарбоевга келсак, мен уни замонавий Қозоғистон давлатчилигининг асосчиси сифатида бир неча бор таърифлаганман. Унинг давлат институтларини яратиш, иқтисодиётда бозор механизмлари ва янги пойтахт қурилишига қўшган ҳиссаси яққол кўриниб турибди. Биласизми, биз Қозоғистонни адолат, қонун ва тартиб юртига айлантирмоқчимиз. Бу мамлакатимизнинг Биринчи Президенти Нурсултон Назарбоевга ҳам тегишли”, деди Қосим-Жомарт Тоқаев.