Афғонистонда ўзбек тилига чекловлар қўйилгани рад этилди

 

 

Ижтимоий тармоқларда Афғонистонда ўзбек тилининг қўлланилишига чекловлар жорий этилгани ҳақида хабарлар тарқалди. Хабарларга аниқлик киритиш мақсадида Ўзбекистон Ташқи ишлар вазирлигининг масъул вакиллари тезкор тарзда Афғонистон Ташқи ишлар вазирлиги билан боғланди. Афғонистонлик расмийлар эса бундай хабарлар ҳақиқатга мос эмаслигини, мамлакат ҳудудида ўзбек тилидан фойдаланишга ҳеч қандай чеклов қўйилмаганини қатъий тасдиқлади. Улар Афғонистон ҳукумати ва халқи ўзбек халқига ва унинг тилига чуқур ҳурмат билан муносабатда эканини алоҳида таъкидлади. Бу ҳақда Ўзбекистон Ташқи ишлар вазирлигини хабар берди.

 

Шунингдек, Афғонистон ҳукумати олий таълим муассасалари ва умумтаълим мактаблари пештоқларини ягона стандарт бўйича тартибга солиш ишлари олиб борилаётганини билдирди. Бунда пештоқлар мамлакат бўйлаб уч тилда — пушту, дарий ва инглиз тилларида берилади. Шимолий ҳудудлар, жумладан Саманган университети учун эса истисно тариқасида ёзувлар пушту, дарий ва ўзбек тилларида жойлаштирилади.

 

Бундан ташқари, Афғонистон ҳукумати тарихда илк бор Жоузжон давлат университетида магистратура босқичида “Ўзбек тили ва адабиёти” факультетини ташкил этишни режалаштирмоқда. Бу қарор икки мамлакат ўртасидаги яхши қўшничилик, ўзаро ишонч ва дўстона муносабатларнинг ёрқин ифодаси сифатида баҳоланмоқда.