Эронда бутун мамлакат бўйлаб интернет алоқаси тўлиқ ўчирилди
Эрон расмийлари йирик норозилик намойишлари ёки беқарорлик хавфи кучайган паллаларда интернетга киришни чеклаш ёки уни тўлиқ ўчириш амалиётини мунтазам қўллаб келади.
Эронда декабрь ойидан буён давом этаётган оммавий норозилик намойишлари фонида мамлакат бўйлаб интернет алоқаси тўлиқ ўчирилди. Бу ҳақда тармоқ мониторинги билан шуғулланувчи NetBlocks хизмати маълум қилди.
Хизмат баёнотида қайд этилишича, реал вақт режимидаги кузатувлар Эрон ҳукумати томонидан норозилик намойишларига қарши кучайтирилган рақамли цензура чоралари жорий этилганини ва бунинг натижасида бутун мамлакат бўйлаб интернетга кириш деярли тўхтатилганини кўрсатмоқда.
Хизмат мутахассисларига кўра, интернетнинг узилиши норозилик намойишлари тарқалаётган бир пайтда воқеаларни жойидан ёритиш ва ахборот алмашинуви имкониятларини жиддий даражада чеклайди.
Норозиликлар Эрон риалининг кескин қадрсизланиши, халқаро санкциялар ва Исроил билан юзага келган ҳарбий кескинлик оқибатида инфляция даражасининг қарийб 50 фоизга етгани фонида бошланган. Намойишлар ўнлаб шаҳарларга тарқалиб, камида 39 нафар киши, жумладан, 4 нафар хавфсизлик ходими ҳалок бўлган, 2260 дан ортиқ фуқаро ҳибсга олинган. Тартибни тиклаш чоғида ҳуқуқни муҳофаза қилувчи органлар томонидан кўз ёшартирувчи газ қўлланилгани хабар қилинмоқда.
АҚШ президенти Доналд Трамп норозилик намойишлари зўравонлик билан бостирилган тақдирда, Қўшма Штатлар ҳарбий куч ишлатишга тайёрлигини билдирган. Ушбу баёнот Теҳронда кескин муносабатга сабаб бўлиб, Эрон расмийлари уни «бепарволик» деб баҳолади ва Ғарб давлатларини мамлакат иқтисодиётини беқарорлаштиришга уринишда айблади.
Эрон расмийлари йирик норозилик намойишлари ёки беқарорлик хавфи кучайган паллаларда интернетга киришни чеклаш ёки уни тўлиқ ўчириш амалиётини мунтазам қўллаб келади.
