“Шикояти йўқ” — Колонияда Мубашшир Аҳмад аҳволи ўрганилди

 

Аввалроқ Мубашшир Аҳмад тахаллуси билан танилган диний блогер Алишер Турсуновнинг ҳимоя жамоаси унинг соғлиғи билан боғлиқ жиддий муаммолар сабаб жазони ижро этиш колониясидан озод этилишини талаб қилгани ҳақида хабар берилган эди.

 

Оммавий ахборот воситалари ҳамда ижтимоий тармоқларда тарқалган хабарлар асосида Олий Мажлиснинг Инсон ҳуқуқлари бўйича вакилининг (Омбудсман) Навоий вилоятидаги минтақавий вакили томонидан вилоятдаги 5-сонли жазони ижро этиш колониясига мониторинг ташрифи амалга оширилди.

 

Мониторинг доирасида ушбу муассасада жазо муддатини ўтаётган маҳкум A.T. (Мубашшир Аҳмад)нинг соғлиғи, тиббий таъминоти ҳамда сақланиш шароитлари ўрганилди. Ташриф давомида маҳкумлар, жумладан A.T. билан ҳоли тарзда суҳбатлар ўтказилиб, унинг соғлиғига оид тиббий ҳужжатлар билан танишилди.

 

Маҳкум A.T. муассасада тиббий ёрдам кўрсатилишидан шикояти йўқлигини, мунтазам равишда тўлиқ тиббий кўрикдан ўтказиб келинаётганини маълум қилди. У соғлиғидаги айрим ўзгаришлар аввалдан мавжуд бўлган касалликлар билан боғлиқлигини, ҳозирда эса тегишли тиббий ёрдам олаётганини қайд этди.

 

Шунингдек, A.T. муассасада ўз хоҳишига кўра меҳнатга жалб этилгани (ошхона ишлари билан шуғулланиши), қонунчиликда белгиланган вақтлардан ташқари ортиқча меҳнатга жалб этилмаётгани, иш шароитлари эса меҳнатни муҳофаза қилиш қоидаларига мувофиқ эканини билдирди.

 

Озиқ-овқат таъминоти ва яшаш шароитлари бўйича ҳам эътирозлар билдирилмади. Маҳкумнинг сўзларига кўра, соғлиғидан келиб чиқиб, унга белгиланган норма асосида озиқ-овқат берилмоқда.

 

Ҳоли тарзда ўтказилган суҳбат давомида A.T. томонидан ҳеч қандай мурожаат ёки шикоят билдирилмаган.

 

Маълумот учун, Омбудсманнинг Навоий вилоятидаги минтақавий вакили томонидан 2025 йил ноябрь ва декабрь ойларида мазкур муассасага амалга оширилган аввалги мониторинг ташрифлари чоғида ҳам A.T. томонидан мурожаатлар келиб тушмаган.