Россиялик депутат Валуев Марказий Осиё бўйича кескин баёнот берди
Валуевнинг “қаттиқ чоралар” ҳақидаги сўзларига Руслан Чагаев жавоб қайтариб, Марказий Осиёга нисбатан таҳдидларни қабул қилиб бўлмаслигини билдириб, унга қарши яна рингга чиқишга тайёр эканини билдирди.
Россиялик собиқ профессионал боксчи, Давлат Думаси депутати Николай Валуевнинг Марказий Осиё давлатларига нисбатан кескин ва таҳдидли баёнотлари минтақада жамоатчилик эътиборини тортди.
Валуев сўнгги 30 йил давомида Россия собиқ СССР республикаларига нисбатан “юмшоқ сиёсат” юритганини, бироқ бу ёндашув самара бермаганини таъкидлаб, келгусида “қаттиқ чоралар” ва янги “махсус операциялар” эҳтимолини илгари сурди. У бу борада россиялик сиёсий файласуф Александр Дугин қарашларини қўллаб-қувватлашини ҳам билдирган.
Шунингдек, Валуев ёш авлодни, хусусан «зумерлар»ни жисмоний тайёргарликка чақириб, яқин келажакда “қаҳрамонлар вақти” келишини иддао қилган.
Мазкур баёнотларга жавобан ўзбекистонлик собиқ профессионал боксчи Руслан Чагаев Валуевнинг фикрларини кескин танқид қилди. Чагаев Марказий Осиёга нисбатан айтилган таҳдидли сўзларни қабул қилиб бўлмаслигини таъкидлаб, зарурат туғилса, Валуевга қарши яна рингга чиқишга тайёр эканини билдирди.
Чагаев, шунингдек, Россия ва Ўзбекистон раҳбарлари ўртасидаги ижобий муносабатларга бундай баёнотлар путур етказишини қайд этди.
Эслатиб ўтамиз, аввалроқ россиялик мафкурачи Александр Дугин собиқ СССР таркибида бўлган давлатлар, жумладан Ўзбекистон мустақиллигини тан олмаслик ҳақида фикр билдирган эди.
Шунингдек, телебошловчи Владимир Соловёв Марказий Осиё давлатларида ҳам “махсус ҳарбий операциялар” ўтказиш зарурлигини айтган.
Россия ТИВ расмий вакили Мария Захарова эса Соловёв баёнотлари Россиянинг расмий позицияси эмаслигини маълум қилган эди.
