Ўзбекистонда солиқ қонунбузарликлари ҳақида хабар берганларга 3 млрд сўм тўланди
“Солиқ ҳамкор” тизими орқали бир ойда 12 мингдан ортиқ мурожаат келиб тушган.
Жорий йилнинг январь ойида Солиқ қўмитаси томонидан фуқароларга “Солиқ ҳамкор” тизими орқали солиқ қонунбузарликлари ҳақида хабар берганликлари учун жами 3 миллиард сўм миқдорида рағбат пули тўлаб берилди.
Ҳисобот даврида тизим орқали 12 486 та мурожаат келиб тушган. Ушбу мурожаатлар асосида ўтказилган текширувлар натижасида 99 фоиз ҳолатда қонунбузарликлар тасдиқланган.
Шикоятларнинг асосий қисми нақд пул чекларини тақдим этишдан бош тортиш билан боғлиқ бўлиб, бу йўналишда 10 879 та мурожаат қайд этилган. Шунингдек, 510 та ҳолатда банк картаси орқали тўловни қабул қилмаслик, 34 та ҳолатда эса нақд пульсиз тўловлар учун асоссиз равишда оширилган нархлар юзасидан мурожаатлар келиб тушган.
Мазкур маълумотлар асосида солиқ органлари томонидан 5 мингдан ортиқ жойда текширувлар ўтказилган ва 4 782 нафар хабар берувчига ундирилган жарималарнинг 20 фоизи миқдорида рағбатлантириш маблағлари ажратилган.
