Дубайдан Тошкентга йўловчиларсиз парвоз амалга оширилди
Форс кўрфазидаги нотинчлик туфайли ҳаво ҳудуди ёпилган Дубай халқаро аэропортидан Тошкентга илк техник рейс учирилди.
Маълум қилинишича, Дубай—Тошкент йўналишида C6358 рейси Centrum Air авиакомпаниясига тегишли самолёт билан амалга оширилди.
Авиакомпания матбуот хизмати ҳозирги вақтда Дубай аэропорти йўловчиларни олиб чиқиш учун рейсларни амалга оширишга рухсат бермаганини қайд этган. Рухсат фақат ҳаво кемаларининг техник парвозларини амалга ошириш учун тақдим этилган.
Яқин Шарқда кузатилаётган уруш туфайли ҳаво маконидан фойдаланиш бўйича жорий этилган вақтинчалик чекловлар сабабли қатор авиақатновлар бекор қилинганди.
2 март куни Президент Шавкат Мирзиёев Форс кўрфази мамлакатларида бўлиб турган ватандошларни ватанига қайтаришни самарали ташкил этиш юзасидан Бош вазир Абдулла Ариповга топшириқ берди. Жидда—Тошкент йўналишида рейсларни ташкил этиш бошланди.
