BMW уриб кетиши оқибатида ҳалок бўлган ЙПХ ходимининг оиласига Тошкентдан уй берилди
Ҳосилбек Эшназаровнинг хотирасига бағишлаб ёдгорлик мажмуаси очилди.
Тошкент шаҳар ИИББда хизмат вазифасини бажариш чоғида ҳалок бўлган кичик сержант Ҳосилбек Эшназаровнинг хотирасига бағишлаб ёдгорлик мажмуаси очилди ва оиласига Президент қарори билан 3 хонали уй берилди. Бу ҳақда Ички ишлар вазирлиги хабар берди.
Маросимда Ички ишлар вазирлиги раҳбарияти, пойтахт жамоатчилиги, ходимнинг сафдошлари ва оила аъзолари иштирок этган. Тадбирда Ички ишлар вазири томонидан Ҳосилбекнинг машаққатли хизмат фаолияти, жасорати ва Президент томонидан эътироф этилганлиги таъкидланган.
Шунингдек, давлат раҳбарининг ташаббуси билан Ҳосилбек “Жасорат” медали билан мукофотланиб, медаль унинг отасига топширилган. Эшназаровлар оиласи бундан ташқари доимий ижтимоий ҳимояга эга бўлиши таъминланиши айтилган.
Хабарда қайд этилишича, Қашқадарё вилоятининг Ғузор туманидаги 62-мактабда эса ходим хотирасига ёдгорлик ўрнатилади.
2026 йил 25 феврал куни Миробод туманида вояга етмаган Дониёр Турғунов томонидан автомашинада уриб кетилиши натижасида Эшназаров ҳалок бўлган. Жиноят иши доирасида Турғунов Жиноят кодексининг 267-моддаси 1-қисми (транспорт воситасини олиб қочиш) ва 104-моддаси 3-қисми “д” банди бўйича гумон қилинувчи сифатида жалб этилган.
Суднинг 28 февраль кунги ажрими билан Турғуновга нисбатан “қамоққа олиш” эҳтиёт чораси қўлланиб, тергов устидан назорат Бош прокурор томонидан ўрнатилган.
