Хорижлик фуқаро Ўзбекистонга спорт озуқаси кўринишида синтетик гиёҳвандлик моддасини олиб кирмоқчи бўлди
Мазкур гиёҳванд моддаларни қабул қилиб олиши керак бўлган шахс Бектемир туманида қўлга олинган.
Тошкент аэропортида Бишкекдан учиб келган қўшни давлат фуқароси божхонадан “яшил” йўлак орқали ҳаракатланиб, жомадонида синтетик гиёҳвандлик воситаларини олиб киришга урингани фош қилинди. Бу ҳақда Ўзбекистон Давлат божхона қўмитаси хабар берди.
Қўмита хабарида қайд этилишича, спорт озуқаси сифатида олиб ўтилаётган 2 та қутидаги 684 дона капсула таркибида 560,75 гр. “alfa-PVP” синтетик гиёҳвандлик моддаси мавжудлиги аниқланган.
Мазкур жиноятнинг тармоқларини тўлиқ ўрганиш мақсадида Тошкент шаҳрида тезкор тадбир ўтказилган. Натижада гиёҳванд моддаларни қабул қилиб олиши керак бўлган шахс ҳам Бектемир туманида қўлга олинган.
“Мазкур шахснинг хонадони текширилганда 114 дона капсулада тахминан 80 гр. оғирликдаги “alfa-PVP” синтетик гиёҳвандлик моддаси ва уларни тарқатиш учун ҳозирланган 37 дона ўрамчалар, 2 гр. оғирликдаги “марихуана”, 2 дона ўрамда 30 гр. оғирликда бошқа турдаги синтетик наркотик модда, 4 дона электрон тарози, изоленталар ва зип пакетлар мавжудлиги аниқланиб, далилий ашё тариқасида олинди”, дейилади қўмита хабарида.
Аввалроқ, Сурхондарё вилоятида мактаб ўқитувчисининг 14 дона ўрамга жойланган 14 кг. 680 гр. оғирликдаги "опий" гиёҳвандлик воситасини 180 минг АҚШ долларига сотаётган вақтида қўлга олингани хабар берилганди.
Ҳозирда ҳар иккала ҳолат юзасидан божхона органлари томонидан жиноят ишлари қўзғатилди.
