Мен Мужтабо Хоманаийнинг ўлганини эшитдим — Трамп
АҚШ президенти унинг ҳозирги ҳолати ҳақида аниқ маълумот йўқлигини таъкидлади.
Дональд Трамп Эроннинг янги Олий раҳбари Мужтабо Хоманаий тириклигига шубҳа билдирганини маълум қилди. Бу ҳақда у NBC News телеканалига берган интервьюсида айтиб ўтган.
АҚШ президенти сўзларига кўра, Мужтабо Хоманаийнинг ҳозирги ҳолати ҳақида аниқ маълумот йўқ.
“У тирикми ёки йўқми, билмайман. Уни ҳали ҳеч ким кўрсата олмади. Унинг ўлганини эшитдим. Агар бу рост бўлмаса, у ўз мамлакати учун жуда ақлли қарор қабул қилиши керак — таслим бўлиши керак”, — деган Дональд Трамп.
Шу билан бирга, Аббос Ароқчи эса бир кун аввал Мужтабо Хоманаий ўз вазифаларини бажаришда давом этаётгани ва иш фаолиятини нормал олиб бораётганини билдирган.
12 март куни эса The Sun нашри Мужтабо Хоманаий ҳаво ҳужуми оқибатида оғир жароҳат олгани ҳақида хабар тарқатган эди. Нашр маълумотларига кўра, у бир ёки иккала оёғидан айрилган бўлиши мумкин ва комада экани тахмин қилинмоқда.
Аввалроқ Хоманаийнинг Россияга даволаниш учун кетгани хабар қилинган эди.
