Эрон Али Ларижонийнинг ўлими учун Исроилдан қасос олишини маълум қилди
Исроил ҳужумлари оқибатида Ларижонийнинг ўғли ва унинг ўринбосари ҳам ҳалок бўлган.
Эрон расмийлари Исроил ҳужумлари натижасида Миллий хавфсизлик кенгаши котиби Али Ларижоний ҳалок бўлганини тасдиқлаб, кескин жавоб қайтарилишини маълум қилди.
Эрон Ислом инқилоби қўриқчилари корпуси баёнотига кўра, Исроилнинг ҳаво зарбалари оқибатида Ларижоний билан бирга унинг ўғли Муртазо ҳамда хавфсизлик хизмати бўйича муовини Алиризо Баят ҳам ҳалок бўлган.
Маълум қилинишича, Ларижоний Теҳрон яқинидаги Пардис туманида жойлашган қизнинг уйида бўлган вақтда ҳужумга учраган. У ерда у ўғли, ёрдамчиларидан бири ва бир неча тансоқчилари билан бирга бўлган.
Ислом инқилоби қўриқчилари корпуси баёнотида ушбу ҳодиса “жавобсиз қолмаслиги” таъкидланиб, Ларижоний ва бошқа ҳалок бўлганлар учун “интиқом” олиниши айтилган.
Эрон Президенти Масъуд Пезешкиён ҳам мазкур воқеага муносабат билдириб, айбдорлар қаттиқ жазоланишини таъкидлади.
“Эрон заминининг шаҳидлари қони билан қўлларини булғаганлар муқаррар равишда жазога тортилади”, — деди Президент.
Али Ларижоний ядровий музокаралар бўйича собиқ вакил ва Эрон олий раҳбарига яқин сиёсий арбоблардан бири сифатида танилган. У сўнгги бор 13 март куни Теҳронда ўтказилган Қудс куни тадбирларида кўриниш берган эди.
Шу куни АҚШ томонидан Эроннинг юқори лавозимдаги ҳарбий ва разведка амалдорлари, жумладан, Ларижоний ҳақида маълумот учун 10 миллион долларгача мукофот эълон қилингани ҳам хабар қилинган.
