АҚШ Эронга зарбаларни давом эттиради, сулҳ фақат энергетика объектларига тааллуқли — Semafor
Шунингдек, АҚШ расмийси “Эпик ғазаб” операциясининг дастлабки босқичлари давом этишини билдирган.
АҚШ Эронга зарбаларни давом эттиради, танаффус эса фақат Теҳроннинг энергетика объектларига қилинган ҳужумларга тааллуқли бўлади. Бу ҳақда Semafor нашри АҚШ расмийсига таяниб хабар берди.
Мазкур маълумот АҚШ президенти Доналд Трамп номаълум эронлик расмийлар билан ўтказган “самарали” музокарасидан сўнг эълон қилинди.
Аввалроқ Трамп Эроннинг электр станциялари ва энергетика инфратузилмасига зарба бериш режасини беш кунга тўхтатганди. Кейинчалик Эрон АҚШ билан музокаралар олиб борилганини рад этди.
“Беш кунлик ҳужумларни тўхтатиш фақат уларнинг энергетика объектларига нисбатан амал қилади”, — деган АҚШ расмийси Semafor'га.
Расмийнинг қўшимча қилишича, танаффус ҳарбий объектлар, денгиз кучлари, баллистик ракеталар ва мудофаа саноати инфратузилмасига тааллуқли эмас.
“Эпик ғазаб операциясининг дастлабки босқичлари давом этади”, — деган у.
Шунингдек, Семафор хабарига кўра, Исроил Вашингтон ва Теҳрон ўртасидаги музокараларда иштирок этмаган.
Reuters агентлиги ушбу хабарни дарҳол мустақил тасдиқлай олмаган. Оқ уй, АҚШ Давлат департаменти ва Пентагон иш вақтидан ташқари берилган сўровларига жавоб бермаган.
