Доналд Трамп Эронга мамлакатни биргаликда бошқаришни таклиф қилди

АҚШ президенти Доналд Трамп Эронга “қўшма раҳбарият” шаклидаги бошқарувни таклиф қилди. Трамп бу ҳақда 23 март куни Теҳрон билан музокаралар ўтказилгани ҳақидаги хабарлар фонида маълум қилди.

 

Трампнинг айтишича, тўрт ҳафтадан бери давом этаётган ҳарбий кескинлик шароитида АҚШ Эронни номи ошкор этилмаган эронлик етакчи билан биргаликда бошқариши мумкин. У мамлакатда “режим ўзгаришининг жуда жиддий шакли” юз бериши эҳтимолини ҳам тилга олди.

 

“Ўйлайманки, бу қўшма етакчилик бўлиши мумкин”, — деди Оқ уй раҳбари.

 

Шунингдек, Трамп АҚШ Венесуэладаги каби янги етакчини қўллаб-қувватлаш вариантини ҳам кўриб чиқиши мумкинлигини билдирди.

 

Президент 23 март куни Эрон энергетика инфратузилмасига режалаштирилган зарбаларни беш кунга қолдиришга қарор қилганини маълум қилди. Унинг сўзларига кўра, бу қарорга Исроил ҳам амал қилади.

 

 Аввалроқ Трамп Эрон ҳукуматига Ҳормуз бўғозини қайта очиш учун 48 соат муддат берган эди.

 

Трамп “жуда жиддий музокаралар” олиб борилаётганини таъкидлаб, мазкур бўғоз устидан назорат ҳам муҳокама қилинаётганини билдирди. “Бўғозни мен ва раҳнамо биргаликда назорат қилишимиз мумкин”, — деди у.

 

АҚШ президенти, шунингдек, Эрон расмийлари ядровий қуролдан воз кечиш талабига рози бўлганини иддао қилди. Бироқ Эрон ОАВлари икки давлат ўртасида ҳеч қандай музокаралар ўтказилмаганини маълум қилмоқда.

 

Трампнинг ҳаво зарбаларини кечиктиргани ҳақидаги хабарлар ортидан жаҳон молия бозорларида кескин ўзгаришлар кузатилди. Хусусан, Brent маркали нефть нархи 14 фоизга пасайиб, бир баррели учун 96 долларгача тушди.